ستمبر کاشت کماد کو پہلا پانی کب دیں؟ مکمل آبپاشی گائیڈ

ستمبر کاشت کماد کو پہلا پانی زمین کی نمی اور فصل کی حالت دیکھ کر دینا بہتر ہوتا ہے۔

 کسان دوستو! جب بھی کوئی نیا کسان مجھ سے پوچھتا ہے کہ ستمبر میں کماد لگایا ہے، پہلا پانی کب دوں؟، تو میرا پہلا جواب یہی ہوتا ہےکہ کیلنڈر مت دیکھیں، کھیت کو دیکھیں۔ 

میں نے سالوں میں یہ بات اپنے تجربے سے سیکھی ہے کہ اگر پانی بہت جلدی دے دیا جائے تو زمین میں نمی زیادہ ہو جاتی ہے اور کبھی پانی کھڑا رہنے کا مسئلہ بھی بن جاتا ہے۔ اور اگر دیر کر دی جائے تو بیج کی نئی کونپلیں خشکی کی وجہ سے متاثر ہو جاتی ہیں۔

اصل بات یہ ہے کہ پانی دینے کا فیصلہ صرف دن گن کر نہیں ہونا چاہیے۔ زمین کی قسم، اس میں موجود وتر، موسم، کاشت کا طریقہ اور بیج کی حالت، یہ سب مل کر بتاتے ہیں کہ پانی کب دینا ہے۔ 

ستمبر کاشت کماد کے ابتدائی دنوں میں یہی چھوٹی سی احتیاط آگے چل کر اچھے اگاؤ اور زیادہ تعداد میں پودوں کی بنیاد بنتی ہے۔

اس مضمون کو Pak Agri Info پر نہایت سادہ اور تفصیل کے ساتھ ستمبر میں کماد کو آبپاشی کے بارے میں لکھا گیا ہے۔ میں امید کرتا ہوں کہ یہ میرے کسان بھائیوں کےلیے اہم معلومات فراہم کرے گا۔

پہلا پانی کب دوں؟

میں کاشت کے بعد سیدھا کھیت میں جاتا ہوں اور زمین کی نمی دیکھتا ہوں کیونکہ یہی سب سے اچھا پیمانہ ہے۔ اگر کاشت کے وقت زمین میں مناسب وتر موجود تھا اور بیج کو نمی مل رہی ہے تو فوراً دوبارہ پانی دینے کی کوئی ضرورت نہیں ہے۔

لیکن اگر زمین ہلکی ہو، موسم گرم اور خشک ہو، اور اوپر کی مٹی تیزی سے خشک ہونے لگے، تو پانی میں زیادہ دیر نہیں کرنی چاہیے۔ نئی کاشت میں میرا مقصد ہمیشہ یہی ہوتا ہے کہ بیج کے ٹکڑوں کے اردگرد نمی برقرار رہے، مگر پانی کھڑا نہ ہو سکے۔

سندھ کے محکمہ زراعت کی معلومات کے مطابق پنجاب اور سندھ میں خزاں کی کماد عموماً ستمبر کے پہلے ہفتے سے اکتوبر کے وسط تک کاشت کی جاتی ہے، اور اسی عرصے میں نمی کا صحیح انتظام فصل کے کامیاب قیام کے لیے بہت اہم ہوتا ہے۔ 

پانی دینے سے پہلے میں زمین کو خود چیک کرتا ہوں

پہلا پانی دینے سے پہلے زمین کی نمی اور کماد کی ابتدائی حالت کا جائزہ ضرور لیں۔

بہت سے کسان یہ غلطی کرتے ہیں کہ صرف اس لیے پانی لگا دیتے ہیں کہ کاشت کو چند دن گزر گئے ہیں۔ میں ایسا نہیں کرتا ہوں، میں پہلے کھیت میں جا کر مٹی کو ہاتھ سے دیکھتا ہوں، اور صرف ایک جگہ سے نہیں بلکہ کھیت کے مختلف حصوں سے چیک کرتا لیتا۔

اگر مٹی میں مناسب نمی موجود ہو، گنے کے ٹوٹکے خشک نہ ہو رہے ہوں، وتر برقرار ہو اور موسم میں بارش یا نمی کا امکان ہو، تو میں جلدی پانی نہیں دیتا۔ لیکن اگر اوپر کی مٹی خشک ہو رہی ہو، بیج کے ٹکڑے خشک محسوس ہوں، کونپلیں نکلنے میں دشواری ہو رہی ہو، یا ہلکی زمین میں نمی تیزی سے ختم ہو رہی ہو، تو ایسی صورت میں پانی کی ضرورت پہلے پیدا ہو جاتی ہے۔

ہلکی اور بھاری زمین میں پہلا پانی ایک جیسا نہیں ہوتا

یہ بات میں ہر نئے کسان کو خاص طور پر بتاتا ہوں کہ، ریتلی یا ہلکی زمین اور بھاری زمین میں پانی کا معاملہ ایک جیسا نہیں ہوتا۔

ہلکی زمین پانی کو زیادہ دیر روک نہیں پاتی، اس لیے نمی جلد ختم ہو سکتی ہے۔ ایسی زمین میں، میں فصل اور مٹی کی نمی کو زیادہ قریب سے دیکھتا ہوں۔ بھاری زمین میں نمی نسبتاً زیادہ دیر برقرار رہتی ہے، اور اگر ایسی زمین میں بار بار پانی دے دیا جائے تو جڑوں کو ہوا نہیں ملتی اور پانی کھڑا ہونے کا مسئلہ بن جاتا ہے۔

اسی لیے میں کبھی یہ نہیں کہتا کہ ہر ستمبر کاشت کماد کو فلاں دن ہی پہلا پانی دیں۔ زمین کی حالت دیکھ کر فیصلہ کرنا ہی درست طریقہ ہے۔

پانی کھڑا نہ ہونے دیں

نئی کاشت میں ایک بات کا خاص خیال رکھنا ضروری ہے۔ پانی صرف اتنا لگے کہ مطلوبہ نمی پیدا ہو جائے۔ اگر کھیت میں پانی دیر تک کھڑا رہے تو بیج والے ٹکڑوں کو نقصان پہنچ سکتا ہے۔ خاص طور پر ایسی زمین میں جہاں نکاسی پہلے ہی کمزور ہوتی ہو۔

میں آبپاشی سے پہلے کھالوں اور وٹوں کو ضرور دیکھ لیتا ہوں۔ جہاں پانی رکنے کا امکان ہو، وہاں نکاسی کا راستہ درست کرنا زیادہ ضروری سمجھتا ہوں۔ زیادہ پانی لگانا ہمیشہ بہتر آبپاشی پلان نہیں ہوتا۔

پہلے 30 دن میں پانی کا اصل مقصد کیا ہے؟

پہلے 30 دن کماد کی فصل کے لیے سب سے حساس دن ہوتے ہیں۔ اس دوران میرا مقصد صرف یہ ہوتا ہے کہ بیج کو مناسب نمی ملتی رہے اور زمین مکمل خشک نہ ہو، پانی کھڑا نہ رہے، کونپلیں آسانی سے باہر نکل سکیں۔ اور اگاؤ کے بعد پودے کمزور نہ رہیں۔ اگر فصل اچھی طرح اگ رہی ہو اور نمی مناسب ہو تو میں غیر ضروری پانی دینے سے پرہیز کرتا ہوں۔

اس پورے پہلے مہینے کو میں نے تفصیل سے ایک الگ رہنمائی میں بھی لکھا ہے، جہاں آبپاشی کے ساتھ اگاؤ، جڑی بوٹیوں اور ابتدائی کھاد کا مکمل خاکہ موجود ہے ستمبر کاشت کماد کی ابتدائی 30 دن کی دیکھ بھال کو ضرور پڑھیں۔

ستمبر کاشت کماد کے ابتدائی پانی کے بعد اگر فصل اچھی طرح اگ رہی ہو اور قطاروں کے درمیان مناسب جگہ موجود ہو تو کنولا یا سرسوں کو بین فصل کے طور پر شامل کیا جا سکتا ہے۔ ایسی صورت میں پانی اور فصل کی ترتیب دونوں پر توجہ دینا ضروری ہے۔ کینولہ اور سرسوں کی کاشت کا صحیح وقت، منظور شدہ اقسام اور بیج کی شرح کے بارے میں مکمل رہنمائی بھی پڑھیں۔

پہلی آبپاشی کے بعد اگلا پانی کب دوں؟

پہلی آبپاشی میں پانی کا مناسب بہاؤ رکھیں اور کھیت میں غیر ضروری پانی کھڑا نہ ہونے دیں۔

پہلے پانی کے بعد بھی میں کیلنڈر دیکھ کر فوراً اگلا پانی نہیں دیتا۔ کھیت میں جا کر دوبارہ مٹی کی نمی دیکھتا ہوں، کیونکہ ستمبر اور اکتوبر میں موسم بتدریج بدلتا ہے اور پانی کی ضرورت بھی اسی کے ساتھ بدلتی رہتی ہے۔

پنجاب کے محکمہ زراعت کے تحت کام کرنے والے شوگرکین ریسرچ انسٹی ٹیوٹ کے مطابق ستمبر اور اکتوبر میں آبپاشی کا وقفہ عموماً 15 سے 22 دن کے قریب رکھا جاتا ہے۔

جبکہ نومبر سے فروری میں درجہ حرارت اور فصل کی بڑھوتری کم ہونے کے ساتھ یہ وقفہ مزید بڑھ سکتا ہے۔ (محکمہ زراعت پنجاب۔ Sugarcane Research Institute) یہ ایک عمومی رہنمائی ہے۔ 

اصل وقفہ آپ کی مقامی زمین، موسم اور آبپاشی کے طریقے کے مطابق بدل سکتا ہے، اس لیے میں ہمیشہ اپنے کھیت کی نمی کو ہی آخری فیصلہ ساز سمجھتا ہوں۔

آبپاشی، اگاؤ اور جڑی بوٹیاں – تینوں کا آپس میں تعلق

پہلے پانی کے بعد کماد کی اگاؤ، زمین کی نمی اور جڑی بوٹیوں کی صورتحال کا جائزہ لینا ضروری ہے۔

اچھی فصل کے لیے صرف اچھا بیج کافی نہیں ہوتا ہے۔ اگر زمین میں نمی کا انتظام درست نہ ہو تو اچھا بیج بھی مطلوبہ اگاؤ نہیں دے پاتا۔ 

اسی طرح جب پہلا پانی دینے کے بعد نمی مناسب ہوتی ہے تو جڑی بوٹیاں بھی تیزی سے نکل سکتی ہیں۔ میں ہر آبپاشی کے بعد کھیت کا جائزہ ضرور لیتا ہوں۔

 کیونکہ اگر جڑی بوٹیاں کماد کے چھوٹے پودوں سے پہلے بڑھنے لگیں تو وہ پانی، خوراک اور روشنی کے لیے فصل کے ساتھ مقابلہ شروع کر دیتی ہیں۔ 

اس موضوع پر میری تفصیلی رہنمائی یہاں پڑھ سکتے ہیں۔ کماد میں جڑی بوٹیوں کا کنٹرول | اہم جڑی بوٹیاں، نقصان اور مؤثر طریقے۔

ستمبر کاشت کماد میں شروع ہی سے جڑی بوٹیوں کا معائنہ ضروری ہے۔ کماد کے میں پہلے پانی کے بعد کھیت کا معائنہ لازمی کرنا چاہیے۔ ہمارا پہلے پانی کے بعد کماد میں جڑی بوٹیوں کا کنٹرول کے بارے پڑھیں۔

پانی کے ساتھ کھاد کا خیال بھی ضروری ہے

نئی فصل میں پانی اور کھاد کا آپس میں تعلق ضروری ہے، لیکن اس کا مطلب یہ نہیں کہ ہر پانی کے ساتھ کھاد ڈال دی جائے۔ کماد کی غذائی ضرورت زمین کی زرخیزی اور مٹی کے تجزیے کے مطابق بدلتی رہتی ہے۔

 اگر آپ DAP، پوٹاش اور دوسری کھادوں کا مکمل استعمال سمجھنا چاہتے ہیں تو یہ رہنمائیاں بھی ضرور پڑھیں کہ کماد میں فاسفورس (DAP) کی اہمیت، فوائد، مقدار اور استعمال کا صحیح وقت اور اس کے ساتھ کماد میں پوٹاش کی اہمیت، فوائد، استعمال اور صحیح وقت۔  

اگر آپ پوری فصل کا کھاد پلان ایک ہی جگہ دیکھنا چاہیں تو کماد کی کھادوں کا مکمل شیڈول ملاحظہ کریں۔

وہ غلطیاں جو میں نے کسانوں کو کرتے دیکھا ہے

1۔ صرف دن گن کر پانی دینا

ہر کھیت کی مٹی اور موسم ایک جیسا نہیں ہوتا۔

2۔ پانی کھڑا چھوڑ دینا

نئی فصل میں ضرورت سے زیادہ پانی فائدے کے بجائے نقصان دیتا ہے۔

3۔ خشک زمین میں زیادہ تاخیر کرنا

اگر مٹی تیزی سے خشک ہو رہی ہو تو صرف مقررہ دن پورے ہونے کا انتظار نہ کریں۔

4۔ پورے کھیت کو ایک جیسا سمجھنا

کئی کھیتوں میں ایک حصہ بھاری اور دوسرا ہلکا ہوتا ہے۔ دونوں کی نمی الگ الگ دیکھیں۔

5۔ بارش کو نظر انداز کرنا

اگر اچھی بارش ہو چکی ہو تو فوراً آبپاشی کرنے کے بجائے پہلے مٹی کی نمی دیکھیں۔

نتیجہ

اگر اس پوری بات کو ایک سادہ جملے میں لکھوں تو بس زمین میں وتر ہے تو جلدی پانی نہ دیں، اور جب مٹی ضرورت کے مطابق خشک ہونے لگے تو آبپاشی کریں۔ پہلا پانی ایسا ہو کہ کماد کے ٹوٹکوں اور کونپلوں کو نمی مل جائے، مگر کھیت میں غیر ضروری پانی کھڑا نہ ہو پائے۔ اس کے بعد بھی ہر پانی سے پہلے مٹی، موسم اور فصل کی حالت دیکھیں کیونکہ یہی طریقہ سالوں سے میرے لیے کارآمد رہا ہے۔

اکثر پوچھے جانے والے سوالات

ستمبر کاشت کماد کو پہلا پانی کتنے دن بعد دیں؟

کوئی ایک مقررہ دن ہر زمین کے لیے درست نہیں۔ زمین میں موجود وتر، مٹی کی قسم، موسم اور فصل کی حالت دیکھ کر پہلا پانی دیں۔

کیا نئی کاشت میں زیادہ پانی دینا فائدہ مند ہے؟

بلکل نہیں۔ مقصد مناسب نمی برقرار رکھنا ہے، پانی کھڑا کرنا نہیں۔

ہلکی زمین میں پانی جلدی دینا چاہیے؟

ہلکی زمین میں نمی جلد ختم ہو سکتی ہے، اس لیے وہاں مٹی کی نمی کو زیادہ قریب سے دیکھنا چاہیے۔

ستمبر کے کماد میں پانی کا وقفہ کتنا رکھیں؟

عمومی رہنمائی میں تقریباً 15 سے 22 دن کا وقفہ بتایا جاتا ہے، لیکن اصل وقفہ زمین، موسم اور آبپاشی کی صورتحال کے مطابق بدل سکتا ہے۔

تحقیق اور ذرائع

یہ مضمون میرے اپنے کھیتی تجربے کے ساتھ ساتھ محکمہ زراعت پنجاب اور ساتھ محکمہ زراعت سندھ کی دستیاب رہنمائی کو مدنظر رکھتے ہوئے لکھا گیا ہے۔ چونکہ ہر زمین اور علاقے کے حالات مختلف ہوتے ہیں، اس لیے حتمی فیصلہ اپنے کھیت کے مشاہدے اور اپنے علاقے کے زرعی ماہر کے مشورے سے کریں۔

اشتراک کریں :